ოდითგანვე ცნობილია, რაც უფრო პატივცემულია ,,უფროსი" მით უფრო დიდი მუცელი აქვს მას. როდესაც გვინდა ვიყოთ კარიერულად ,,მსხვილი ფიგურა", შესაძლოა სწორედ ეს სტერეოტიპი გვიბიძგებს „წონის მატებიკენ" პირდაპირი და გადატანითი მნიშვნელობით...

ეს არის ჭარბი საკვების მიღებისა და სიმსუქნის ძირითადი მიზეზი, როგორც მამაკაცებში, ასევე ქალებში. ძალიან ხშირად ადამიანები ქვეცნობიერად სიყვარულისა და სულიერი სითბოს უკმარისობას საკვების მიღებით ავსებენ. ასეთი ადამიანებისთვის გემრიელად ჭამა ცხოვრებაში სიამოვნების შემოტანის ,,ეფექტური,, და ხშირად ერთადერთი გზაა. რეალურად კი მათ აქვთ საკუთარი თავის სიყვარულის და თვითშეფასების პრობლემა.

ჭარბი საკვების მიღებისას – ადამიანი სიამოვნებას იღებს ,,შთანთქმის,, პროცესისგან, ანუ ამ გზით „აჩუმებს" სტრესსა და შინაგან უკმაყოფილებას. ეს სტრესი მრავალგვარია – სიყვარულში იმედგაცრუება, საყვარელი ადამიანის დაკარგვა, დაძაბული გონებრივი შრომა, აპათია და სიცარიელის შეგრძნება.

როცა ზედმეტწონიან ადამიანს ეკითხებიან პრობლემის მიზეზს, ის ხშირად პასუხობს, რომ ეს გენეტიკურია, რომ მის ოჯახში მისნაირი ბევრია. მაგრამ ხშირ შემთხვევაში საქმე გვაქვს არა ენდოკრინულ დარღვევასთან (რომლისადმი მიდრეკილება მართლა შეიძლება გენეტიკური იყოს), არამედ გრძელი სამუშაო დღის მერე ნოყიერი ვახშმის და ტკბილეულის მიღების სწორედ ,,ოჯახურ" წესთან . ამ შემთხვევაში, გამოდის, ,,ვაბრალებთ" გარემო პირობებს და გვავიწყდება, რომ ჩვენი ცხოვრებისეული რიტმის და კვების წესების ორგანიზება ჩვენვე შეგვიძლია.

სიმსუქნის სათავე ამ შემთხვევაში იწყება ღრმა ბავშვობიდან. ჩვენ ვართ კარგი ბავშვები, თუ თეფშზე არაფერს არ ვტოვებთ. შედეგად ტვინში ფორმირდება მდგრადი პროგრამა – რაც მეტს შევჭამ, მით მეტად შემაქებენ და მომცემენ ,,პრემიას".

სამწუხაროდ, ბავშვობაში ფორმირებული აზრობრივი პროგრამები რჩება ჩვენთან მთელი ცხოვრება. ისინი ,,შთამომავლობითაც" კი გადადის. რატომ? ასეთი ,,კვებითი ჩვევების" მქონე ოჯახში გაზრდილი მსუქანი ქალი, ხომ ასევე ზრდის თავის ქალიშვილს?!

შეიძლება ეს პარადოქსალურად ჟღერდეს, მაგრამ ზოგიერთი ადამიანი (უფრო ხშირად ქალი) შინაგანად უფრთხის ახლო კონტაქტებს და ქვეცნობიერად იღებს გადაწყვეტილებას იყოს მსუქანი, რომ არ მიიპყროს საწინააღმდეგო სქესის ყურადღება. ცნობიერ დონეზე ეს ქალები შეიძლება ცდილობდნენ კიდეც მეწყვილეს პოვნას და იცავდნენ მუდმივად დიეტებს, მაგრამ რეალობაში მათი მადა იმართება ქვეცნობიერი მოტივებით.

ამავე ჯგუფში შეიძლება გავაერთიანოთ ქალები მძიმე განშორების შემდეგ. ამ ფსიქოლოგიური ტრავმის შემდეგ მათში არის ნეგატიური გამოცდილების განმეორების ქვეცნობიერი შიში. ეს კი ზედმეტი კილოგრამების დასაგროვებლად კარგი საბაბია

პრობლემურ ოჯახებში ზედმეტი წონის არსებობა შეიძლება გამოწვეული იყოს წყვილის ურთიერთობით. ესაა:

–ქმრის ეჭვიანობისგან თავდაცვა (ქალი ხდება მსუქანი და არამიმზიდველი, რომ აიცილოს მამაკაცების ყურადღება და როგორც შედეგი, ქმრის ეჭვიანობა);

–ეს შეიძლება იყოს შინაგანი პროტესტი, როცა ქმარი ალკოჰოლიკი და ნარკომანია (,,შენ უკეთესის ღირსი არა ხარ");

– ქმრის ღალატის შესახებ ინფორმაციის მიღებამაც კი შეიძლება გამოიწვიოს წონის მომატება. რაც არ უნდა გასაკვირი იყოს, ამ შემთხვევაში ქალი ცდილობს თავის თავზე აიღოს დანაშაული და გაამართლოს ეს საქციელი იმით, რომ აღარაა მიმზიდველი.

მსუქან ადამიანებს უფრო ლაბილური ფსიქიკა ახასიათებთ. ნებისმიერი ცხოვრებისეული დაბრკოლება იწვევს მათში მძიმე სტრესს. ამით ჩაკეტილი წრე ვიწროვდება, საკვები აძლევს მათ დაცულობის შეგრძნებას კილოგრამები კი- მატულობს.

ადამიანის გემოს რეცეპტორებს აქვს მახსოვრობა. ამიტომ ზოგჯერ პროდუქტის გემო ფასეულია არა როგორც გემო, არამედ როგორც სასიამოვნო მოგონება. ესაა ნოსტალგია ბავშვობაზე, სიმყუდროვეზე, სიყვარულზე, სითბოზე. შედეგად ეს ემოციები გადადის საკვებზე და ის ხდება თავისებური ,,დროის მანქანა", მისი დახმარებით ადამიანი ცდილობს ეპიზოდურად დაიბრუნოს თავისი ცხოვრების სასიამოვნო მომენტები. და ეს მით უფრო ხშირად ხდება, რაც უფრო არაკომფორტულია მისი ცხოვრება დღეს.

ეს კი ალბათ გამოუცდია ყველას, ვინც ხშირად იცავს დიეტას. დაარღვიე დიეტა –ჩავარდი პანიკაში–ისევ ჭამ, რომ ჩაახშო პანიკა. მიხვდით ალბათ, რომ ესეც ჩაკეტილი წრეა...

აქვე განვიხილოთ კონკრეტული შემთხვევა, როცა შიმშილობის და ზედმეტი ჭამის ფაზები ერთმანეთს ხშირად ენაცვლება. სტრესის პარალელურად ავტომატიზმში გადასული ,,ჰიპერჭამის" აქტი და შემდეგ კი შემაწუხებელი შიმშილობის პერიოდი. სტრესი კი სტრესად რჩება და უკვე მუდმივი ხდება.

ამ შემთხვევას განსაკუთრებით ახასიათებს მადის დაქვეითება დილის საათებში და მომატება საღამოს საათებში. ადვილი მისახვედრია, საით მივყავართ ასეთ რეჟიმს.

ყველაფერი კი ისევ მოდის ბავშვური შეგრძნებიდან – როცა ტკივილის დასავიწყებლად გვაძლევდნენ რაიმე ნუგბარს.

ბავშვის აღზრდისას კვება ხშირად ხდება სტრესის შემცვლელი რგოლი. თვითონ ბავშვებიც ასე ინაზღაურებენ ყურადღებისა და დედის სითბოს ნაკლებობას. ძალიან ხშირად მსუქან ადამიანებს აქვთ ზედმეტად ძლიერი ემოციური მიჯაჭვულობა დედასთან, რომელიც მოქმედებს, როგორც დამანგრეველი ტაიფუნი.

როგორც მიხვდით, ეს ყველაფერი ისევ და ისევ ფსიქოლოგიური პრობლემებია, რომლის აღმოფხვრაც შესაძლებელია.

ეს განსაკუთრებით ქალებში ხდება. გაგიკვირდებათ, მაგრამ ზოგ შემთხვევაში ქალს ეშინია (ისევ ქვეცნობიერად) გახდეს ტანადი და მომხიბვლელი, რადგან დაქალებს შეშურდებათ მისი, ქმარი იეჭვიანებს, მოუწევს გარდერობის შეცვლა და ა.შ.

ამ მდგომარეობაში განსაკუთრებით საჭიროა ვებრძოლოთ გაუბედაობას, ავიმაღლოთ თვითშეფასება და ვისწავლოთ მოჩვენებითი კომფორტის ზონიდან დროზე გამოსვლა.

თუ თვლით თავს სხვაზე უარესად (არ მიმართლებს, არ გამომივა, არ ვიცი და ა.შ.), როგორც შედეგი, საბოლოოდ იქცევით ,,ფსკერზე მწოლიარე ლოდად". შეგიპყრობს მელანქოლია, დეპრესია და... საბოლოოდ არამარტო გასუქდებით, არამედ დაკარგავთ ჯანმრთელობას და ცხოვრების მოტივაციას.

თუ ზედმეტად მგრძნობიარე ხართ, ზედმეტად გწყინთ და ა.შ. ანუ ზედმეტად სერიოზულად ეკიდებით ცხოვრებას, უნდა ისწავლოთ არ ,,გადაყლაპოთ,, წყენა. ნეგატიური ენერგეტიკა (ანუ ნაღველი ძველ ხალხურ მედიცინაში) გროვდება ჩვენს ორგანიზმში, იწვევს ჰორმონალურ დისბალანსს, და როგორც შედეგი – ისევ ზედმეტი კილოგრამები.

გადახედეთ თქვენს დამოკიდებულებას გარშემომყოფებთან და ცხოვრებასთან საერთოდ. არ შემოუშვათ თქვენში ღრმად სხვისი ნეგატივი, მან უნდა ჩაგიაროს გვერდით ისე, რომ კვალი არ დატოვოს.

გაუშვით ბოღმა და წყენა! ნუ ,,გაიჭედებით" ამ უკმაყოფილებაში!

თუ ქალს არ უნდა „მეუღლის მოვალეობის" შესრულება, ის სუქდება. მას ქვეცნობიერად უნდა, რომ გახდეს არამიმზიდველი, რათა ქმარმა თავი გაანებოს.

თუ თქვენ გადაწყვეტთ დაიმალოთ პრობლემისგან დიდი წონის უკან, დაფიქრდით, იქნებ ჯობია ამ ფსიქოლოგიური მიზეზისგან განთავისუფლდეთ?

არის 2 გამოსავალი:

– თუ არ გიყვართ –გაყრა.

თუ გიყვართ – ერთად ისწავლოთ სექსისგან სიამოვნების მიღება.

ეს ის შემთხვევაა, როცა არ იცი, დაწერო ,,თავისუფლება" თუ ,,განთავისუფლება". როცა მშობლებს არა აქვთ დრო ბავშვებისათვის, ისინი თავს იკავებენ კატეგორიული აკრძალვებისაგან, ბავშვი ცხოვრობს, „თავისუფლად", აქვს ყველაფერი და მშობლებს ხედავს მხოლოდ ჭამის პროცესში. მხოლოდ ეს ავსებს ყველა დანარჩენ ურთიერთობას.